Sir 46

a46.1-6Yos 1.1—11.23

b46.7-10Dag 14.6-10, 11.21, Yos 14.6-11

c46.11Hgn 1.1—16.31

d46.13-201 Sml 3.19-20, 7.9-11, 10.1, 12.3, 16.13, 28.18-19

Yosua Kalebela henego ogo

1 Ai Nana igini Yosua ibu wai biaga pari wayali hongoheore howa ibugua agali Anduane Homogonaga bi mana latagi halu mbiwia haga Mosesenaga henge mialu ibu ho aribia hene. Ibugua ibunaga mini Yosua ngagonaga galone Anduane Homogohanda biamogo biaga lalu mini wini ngago baya hanguore taluwa biaga henego irane ibugua Anduane Homogonaga wali agaliore haru kogoni lo manda buwaore haga hene. Waitigi Isaraele baba wai biyaru ibugua balu bope haga bini. Tigua wai bialu bope halu dindi Isaraele dindi ti karulo haga bini. ^a 2 Ibugua ayu tibu nene kirabali gadele wai biagane ngago yalu tano mbira ngagoha anda pialu wai birangi ibunaga mini mo yaraga halu ibu mini lene timbuniore haga biaga hene. 3 Agali ala henedaru hongohe Yosua ale mbira nahe. Irane aginaga. Anduane Homogonaga wai bamba hagane hongohe mbira ibu hene. 4 Horo mbirungi Yosuahanda ni abale anda napelo, Yania ha, layagola ni abale anda pialu mbi nale horo luore horo kira ale wini. 5 Ai waitigime bibahendeha ibugu ibugu bialu Yosua halu ibunaga wali agaliru ho hagira biai hayagola ibugua Anduane Homogo Daligaore kago olalu ibu biamogo bialu mo hongo ha, lene. Ani layagola Anduane Homogo Daligaore kagome bi layago hale halu dalu dindi guni timbunioreru waitigi heagoha yagi bape halu waitigi bai hene. 6 Yosuahanda agali uruni bai halu hari bare wiagoha daliape halu puwa halu mende hearume wai bialu hearia urunibi bo hilo wahai dege hene. Anidagua bialu heagola wali agali bibahendeme manda biai halu Yosua ibu wai biaga agali hongohe pari wayaliore howa ibu Anduane Homogo Bibahende Hongo Haiheore kagonaga hame ledago talialu haga ka lo manda biai hene.

7 Mosese heangi Yosuala Yabune igini Kalebelame Anduane Homogonaga bi larago baya hanguore hale haga hene.Wali agalime mine halu kagola libu hongo ho halu wali agalime mana ko nabilo libugua hongo howa mana lalu tigua keba harangi bi nale wahadaba lowa wali agalinaga ne hariga ndibu lalu biaga hene. ^b 8 Agali wai biaga pari wayalioreru handari waragaria Iyibi dindi wahalu tagira ibinigo aria agali kirali ogoni labo hangu nahome hene. Ani howa libugua Isaraele wali agali tinaga dindi gahange Anduane Homogohanda ngulebero lalu lo wini wiagoria haru anda ibini. Dindi ogoniha tomo bayaleore mone taranaga ibanebi nogo andu ibanebi tomo tara tara dewaorebi wiaihe wini. 9 Anduane Homogohanda Kalebe hongo timbuni minigo hongo ogoni ho haabo halu homene. Ibu dindi hari bare mbira wiagoha pu berenego ainde ibu waneigini aguanene hearu ti ogoriani ho aribia halu dindi ogoni aba ti hene. 10 Te ogonime Isaraele waneigini bu hearu tihondo Anduane Homogonaga bi hale holene bayaleore nga lalu lawai hene nga.

Agali haguaneru henego ogo

11 Agali haguane mbira mbira hama ibiniru bibahendeore tigua Anduane Homogo erembira mialu napebi tigua mbirale dama mitangi bialu bi pupu wiaga gime wabini waruhondo bi pupu nawibi bayale hene. Ainde agali haguane uruni mitangi ho haga karu ti turubiore ka. ^c 12 Ainde mana agali haguane uruni tigua bialu henedaru wiaabo helonaga i̱na Anduane Homogohondo bi laro. Ani bialu tinaga waneigini aguane bu karumebi mana mbiraore ogoni taluwa bialu helonaga i̱na Anduane Homogohondo bi laharo.

Samuele Henego ogo

13 Anduane Homogohanda Samuele gubalini timbuni ho hene. Samuele ibu agali Anduane Homogonaga bi mana latagi halu mbiwia hagane ibugua kini holene pigane agali haguaneru helo tinaga haguaneni mbagua odo wialu kini holene hama pelo pigane ibugua dabo helene. ^d 14 Ibugua Anduane Homogonaga bi hale halu wali agali baya hangu haru heagola Anduane Homogohanda Yagaba hameiginiru baya hangu haru hene. 15 Samuele ibu agali Anduane Homogonaga bi mana latagi halu mbiwia hagane heneneore howa ibunaga emaga larago henene tagira piaga lalu wali agalime manda biai ho hene. 16 Waitigi ibalu bibahendeha ho hagira biai kagola Samuelehanda ibu biamogo bule ibu lalu Anduane Homogo Bibahende Hongo Haiheore kago abale olaga. Ani bialu nogo sibi igini hongolo mbira abale bo loma bu miaga hene. 17 Ani biragola Anduane Homogohanda dahuliya andagaha howa bi hongo howa ladali haragola wali agali bibahendeme bi ogoni hale hai haga. 18 Samuelehanda Taia agali haguane bu hearu bo hilo wahai halu Pilidia agali haguane bu hearubi bo hilo wahai halu bini. 19 Ai Samuele ibu homole howa ibugua heneneore Anduane Homogonaga deni howabi kininaga deni howabi gi doladaga halu lalu, I̱na mendealinaga mbirale mbira mo page nabiore haabo hene, lene. Ani layagola mbiralime í̠ ke̱ harego agibe nalene. 20 Ibu homeaha howa mani ibunaga dininime lamialu howa lalu mbi wia halu bi lalu haabo howa kinihondo waitigime kini ibu bo waholebira lalu lamini. Ibu homene dindi humbirini andagaha howa wali agalinaga ko wiaru domo wahalu bi mbiwia halu ogoni lene.